Еңбекті қорғау бала көзімен
Белгілі болғандай, адам өмірінің үштен бірін жұмыста өткізеді, сондықтан жұмыс орнындағы жағдай тиісінше ұйымдастырылуы керек. Еңбекті қорғау талаптарын сақтау және әр жұмыс орнында қауіпсіз жағдай жасау – жұмыс берушінің ғана емес, қызметкердің өзінің де міндеті. Халықаралық еңбек ұйымы (ХЕҰ) үкіметтерді, жұмыс берушілер мен қызметкерлердің бірлестіктерін өз қызметі аясында өндірістегі жазатайым оқиғалар мен кәсіптік аурулардың алдын алуға арналған ақпараттық-түсіндіру науқанын ұйымдастыруға шақырады. Ұйым сондай-ақ еңбек әлеміндегі барлық адамды өз жұмысын қалай ұйымдастыратыны туралы ойланып, бүкіл жұмыс уақытында жазатайым оқиғалар мен аурулардан сақтанатын шараларды айқындауға шақырады. Кәсіби мереке қарсаңында қауіпсіздік және еңбекті қорғау бөлімі комбинат қызметкерлерінің балалары арасында суреттер байқауын ұйымдастырды.
— Байқау өскелең ұрпақтың бойында көркем шығармашылық арқылы еңбек қауіпсіздігінің, еңбек қызметі барысында қызметкерлердің, соның ішінде кәмелетке толмағандардың өмірі мен денсаулығын сақтаудың маңызын түсіну қабілетін қалыптастыру, балалардың шығармашылық қабілеті мен ізденімпаздығын дамыту мақсатында өткізілді, — деп бөлісті қауіпсіздік және еңбекті қорғау бөлімінің бастығы Румия Волокитина.
Байқау қорытындысын шығарып, жеңімпаздарды анықтау үшін арнайы комиссия құрылды. Өз жұмыстарын екі жас тобының балалары ұсынды: 6 жастан 9 жасқа дейінгі және 10 жастан 12 жасқа дейінгі. Балалардың жұмыстары қиял ұшқырлығымен және шығармашылық шеберлігімен таңғалдырды. Әр балалар суретінің өзіндік мәні бар және қауіпсіздік пен еңбекті қорғау тақырыбының маңыздылығын толық көрсетеді. Комиссия шешімі бойынша үздік жұмыстарға ынталандыру сыйлықтары табысталды. Байқау қорытындысы бойынша ет өңдеу комбинатының ғимаратында балалар жұмыстарының көрмесі ұйымдастырылды. Өскелең ұрпақты қауіпсіздік және еңбекті қорғау туралы дұрыс түсінікке тәрбиелеу үшін кәсіпорында мұндай іс-шараны игі дәстүрге айналдыру көзделіп отыр.
